Julisa Frans i Hans Hoogervorst miembronan nobo di Cft

Willemstad – Den su reunion di 17 di desèmber 2021 Konseho di Minister di Reino di a nombra Señora Julisa Frans M.sc. komo miembro di Kolegio di supervision finansiero (Cft), riba proposishon di Sint Maarten i drs. Hans Hoogervorst komo miembro riba proposishon di Hulanda. Komo tal Señora Frans ta susesor di Señor Russell Voges, kende su periodo komo miembro a terminá dia 1 di òktober 2021. Señor Hoogervorst ta tuma lugá di Señor Henk Kamp, kende a retirá dia 24 di sèptèmber 2021, na momento ku el a bira Minister di Defensa den e gabinete demishonario Rutte III. Señora Frans i Señor Hoogervorst ta bira miembro di Kolegio di supervision finansiero di Kòrsou i Sint Maarten. Banda di esaki Señor Hoogervorst ta bira tambe miembro di Kolegio di supervision finansiero di Bonaire, Sint Eustatius i Saba i di Kolegio di supervision finansiero di Aruba (CAft).