Medida drástiko ta inevitabel pa Kòrsou

Gobièrnu di Kòrsou a haña tempu te 6 di mart próksimo pa presentá solushon pa un suma di por lo ménos 127 mion pa sera e défisit di e presupuesto di 2019. Meskos ku tabata e kaso den e último dos añanan, e aña aki tambe ta vislumbrá un défisit presupuestario, a base di kua no ta kumpli ku e normanan di e Lei di Reino di supervishon finansiero. Esaki ta pone ku mester di medida fuerte i urgente pa drecha Kòrsou su presupuesto. E medidanan aki mester surti un efekto durante di mas aña, ya ku riba término mas largu tambe ta pronostiká un défisit supstansial.