A renombrá Hans Hoogervorst i Julisa Frans komo miembro di Cft

Ta renombrá tantu señor Hans Hoogervorst komo señora Julisa Frans pa un di dos término serka e Kolegionan di supervishon finansiero. Riba 29 di novèmber 2024, Konseho di Minister di Reino a aprobá nan renombramentu. Entrante promé di yanüari 2025, riba proposishon di Hulanda, a renombrá Hans Hoogervorst komo miembro di Kolegio di supervishon finansiero Kòrsou i Sint Maarten (Cft), Cft Boneiru, Sint Eustatius i Saba (Cft BES) – a atendé e renombramentu aki den konseho di minister - i Kolegio di supervishon finansiero di Aruba (CAft) pa un término di tres aña. Entrante e mésun fecha, ta renombrá señora Julisa Frans pa e Kolegio di supervishon finansiero Kòrsou i Sint Maarten (Cft), tambe pa un término di tres aña. E renombramentu di señora Frans ta riba proposishon di Sint Maarten. E renombramentunan lo tuma lugá pa Dekreto Real.