Cft: “Apesar di entrada kresiente Kòrsou ta enfrentá retonan grandi”

E añanan benidero Kòrsou ta bai enfrentá gastunan mas haltu komo konsekuensia di e solushon pa ENNIA i e refinansiamentu di sosten di likides. Ademas e riesgonan i inseguridatnan den kuido i seguridat sosial ta keda mésun grandi, i Kòrsou ta pará tambe dilanti di un problema riba tereno di invershon. Den e kòmbersashonnan ku el a hiba resientemente ku gobièrnu di Kòrsou, Kolegio di supervishon finansiero Kòrsou i Sint Maarten (Cft) a pidi atenshon spesial pa e desaroyonan aki. E ekonomia di Kòrsou ta kresiendo, entre otro danki na turismo. Por realisá fortifikashon mas aleu di ekonomia pa medio di invershonnan dirigí. Kumplimento ku deber di paga impuesto (compliance) a mehorá hopi den e último añanan, pero ta nesesario pa ankra esaki den un forma stuktural. Mester evitá ku ta sigui posponé introdukshon di e sistema di pèrmit pa e sektor di gambling. Banda di esei reformanan struktural ta nesesario pa mantené kuido i seguridat sosial aksesibel pa futuro generashonnan.