CAft: “Konsepto di presupuesto 2020 ainda no ta sufisientemente supstansiá”

E konsepto di presupuesto di Aruba pa aña presupuestario 2020 ta sera ku un surplus di 0,6% di Produkto Interno Bruto (GDP). Ku esaki ta kumpli ku e norma pa surplus presupuestario manera menshoná den e protokòl ku a keda akordá ku Hulanda. Pa promé bes despues di basta aña e debe nominal i e gastunan di personal – inkluso esnan di e fundonan presupuestario – lo baha. Ta importante pa Aruba indiká di forma fundamentá kon por sigurá e bahada di e gastunan di personal riba término largu tambe. Mas aleu, pa loke ta trata e entradanan, mester mehorá e forma den kua ta supstansiá e ingresonan insidental tambe. CAft ta pidi mas atenshon pa buska i usa posibilidatnan pa redusí gastunan di gobièrnu – na lugá di hisa impuesto – pa di e forma aki yega na finansa públiko duradero i sostenibel.