Julisa Frans y Hans Hoogervorst, miembronan nobo di Cft

Dia 17 di december 2021 Conseho di Ministro di Reino a bay di acuerdo cu nombramento di Señora Julisa Frans M.Sc. como miembro di Colegio di supervision financiero (Cft) riba proposicion di Sint Maarten y di drs. Hans Hoogervorst como miembro riba proposicion di Hulanda. Señora Frans ta sucede Señor Russell Voges, kende su periodo a caduca dia 1e di october 2021. Señor Hoogervorst ta sucede Señor Henk Kamp, kende a retira dia 24 di september 2021, na momento cu el a bira Ministro di Defensa den e gabinete demisionario Rutte III. Señora Frans y Señor Hoogervorst ta bira miembro di Colegio di supervision financiero (Cft) di Corsou y Sint Maarten. Banda di esey Señor Hoogervorst ta bira miembro tambe di Colegio di supervision financiero (Cft) di Boneiro, Sint Eustatius y Saba, y di Colegio di supervision financiero di Aruba (CAft).