Colegionan
E meta di e Colegionan di supervision financiero (Cft) ta pa realisa finanzas gubernamental duradero hunto cu e gobiernonan di Aruba, Corsou, Sint Maarten, Boneiro, Sint Eustatius y Saba.
E intencion di e Colegionan ta pa contribui positivamente na bon gobierno publico, prosperidad y e bienestar di e poblacion di e islanan y e paisnan.
Historia
Pa hopi aña, Antia Hulandes tawata sufri di problemanan substancial y structural riba e tereno di finanzas gubernamental. E presupuestonan no tawata suficientemente confiabel y realistico, e cuentanan anual a keda compila demasiado laat, e controlnan di auditornan externo tawata atrasa y e posicionnan di debe di e islanan tawata problematico.
Despues cu riba tur isla di ex Antia Hulandes a tene referendum, a bin resulta cu mayoria di e poblacion tawata kier disolve Antia Hulandes como sistema estatal. Durante un prome Conferencia di Mesa Rondo na november 2005, a duna inicio na e creacion di relacionnan politico nobo. Entrante 10 di october 2010, e relacionnan politico nobo aki a keda realisa. Corsou y Sint Maarten a bira paisnan autonomo den Reino. Boneiro, Sint Eustatius y Saba a bira municipionan special di Hulanda.
A palabra cu Hulanda lo asumi gran parti di e debenan di Antia Hulandes, y cu e islanan lo yega na un mehoracion structural di e finanzas gubernamental. Hunto, Hulanda, Corsou y Sint Maarten a acorda cu mester a instaura supervision imparcial riba e finanzas publico di e paisnan nobo. A stipula esaki den e consenso Ley di Reino Supervision Financiero Corsou y Sint Maarten (Rijkswet financieel toezicht Curaçao en Sint Maarten – Rft). Pa Boneiro, Sint Eustatius y Saba a palabra cu e supervision financiero lo tuma luga basa riba un ley hulandes, e Ley di Finanzas Entidad Publico Boneiro, Sint Eustatius y Saba (Wet financiën openbare lichamen Bonaire, Sint Eustatius en Saba – Wet FinBES). Cu e Rft y e Wet FinBES a lanta dos Colegio di supervision financiero: Cft Corsou y Sint Maarten (Cft) y Cft Boneiro, Sint Eustatius y Saba (Cft BES).
For di 1986, Aruba ta pais autonomo den Reino. Na 2015, e situacion financiero di e pais tawata motibo pa establece supervision financiero imparcial pa Aruba tambe. Den e marco aki a acorda algun palabracion cu Hulanda den e Ordenanza Nacional di Supervision Financiero Temporal di Aruba (Landsverordening Aruba tijdelijk financieel toezicht – LAft). E LAft a drenta na vigor riba 2 di september 2015, cu forsa retroactivo te prome di augustus 2015. Asina a lanta e Colegio di supervision financiero di Aruba (CAft) y awor tin tres Colegio di supervision financiero.
Colegio di supervision financiero di Aruba
E Colegio di supervision financiero di Aruba tin un rol identificador y asesor. E tareanan di e Colegio ta dirigi riba e evaluacion di henter e proceso presupuestario den e marco di e normanan cu a ser stipula den e Ordenanza Nacional di Supervision Financiero Temporal di Aruba. E Colegio por duna conseho riba peticion pero tambe sin cu ta pidiele.
Colegio di supervision financiero di Boneiro, Sint Eustatius y Saba
E Colegio di supervision financiero di Boneiro, Sint Eustatius y Saba ta responsabel pa conseha e gobernacionnan di e Entidadnan Publico y e Minister di Asuntonan Interior y Relacionnan den Reino. E Colegio tin un rol importante den e supervision riba e maneho financiero di e Entidadnan Publico. Na tur momento, e Colegio por inicia un investigacion di e maneho y e structuracion di e organisacion financiero. E Colegio por traha palabracionnan tocante di esaki cu e Colegionan Ehecutivo.
Colegio di supervision financiero Corsou y Sint Maarten
E Colegio di supervision financiero Corsou y Sint Maarten tin un rol identificador y asesor. E tareanan di e Colegio ta dirigi riba e evaluacion di henter e proceso presupuestario den e marco di e normanan cu a ser stipula den e Ley di Reino Supervision Financiero Corsou y Sint Maarten. E Colegio por duna conseho riba peticion pero tambe sin cu ta pidiele.
Miembronan di e colegionan
Lidewijde Ongering
Miembro riba proposicion di Reino, simultaneamente Presidente
Hellen van der Wal
Miembro riba proposicion di Aruba
Glenn Thodé
Elizabeth de Cuba
Miembro riba proposicion di Corsou
Julisa Frans
Hans Hoogervorst
Miembro riba proposicion di Hulanda
Lidewijde Ongering
Miembro riba proposicion di Reino, simultaneamente Presidente
Señora drs. L.M.C. (Lidewijde) Ongering ta Presidente di e Colegio di supervision financiero Corsou y Sint Maarten, e Colegio di supervision financiero di Aruba y e Colegio di supervision financiero di Boneiro, Sint Eustatius y Saba for di prome di februari 2023, riba proposicion di Reino. E tin un carera largo di sirbi un multitud di Ministerio hulandes. Entre otro, e tawata Secretario General cerca Ministerio di Asuntonan Economico y Clima, y prome cu esey cerca Ministerio di Infrastructura y Administracion di Awa Publico. Ayanan e tambe tawatin e funcion di Director General di Accesibilidad.
Lidewijde Ongering tambe tawatin e funcion di Coordinador Nacional interino di Combatimento di Terorismo y Seguridad cerca Ministerio di Husticia y Seguridad, Director General interino di Orden y Seguridad Publico cerca Ministerio di Asuntonan Interior y Relacionnan den Reino, y Director di Asuntonan Financiero Economico cerca Ministerio di Salubridad Publico, Bienestar y Deporte. El a obtene e grado di master den Administracion Publico di Technische Universiteit Twente.
Funcionnan adicional: –
Hellen van der Wal
Miembro riba proposicion di Aruba
Señora mr. dr. H.A. (Hellen) van der Wal ta miembro di e Colegio di supervision financiero di Aruba for di prome di augustus 2018. Na 1997, el a cuminsa traha pa Raad van Advies di Aruba, caminda di 2004 pa 2018 e tawata traha como secretario. Den e periodo ey, el a profundisa su conocementonan di finanzas publico. E tawata lidera e investigacion Presupuestonan Nacional y preparacion di e establecemento di Camara Presupuestario di Aruba, e tawata miembro di e Grupo di Estudio Finanzas Publico y miembro di e Comision Fortificacion di e Sistema Democratico.
Banda di esey, Hellen van der Wal tawata envolvi den e Fundacion Kinder- en Jeugdtelefoon Arubiano pa hopi aña, prome como co-fundador y despues como Presidente y Secretario. Ademas, di 2007 pa 2011 e tawata representante caribense den e International NGO Advisory Council for Follow Up to the UN Secretary General’s Study on Violence Against Children. Na 2006, el a lanta e Fundacion Sociedad y Criminalidad, di cua e ta Presidente.
Hellen van der Wal a inicia su carera como hefe di public relations & publicidad cerca Diabetesvereniging Nederland y redactor/productor cerca Fundacion Teleac. E tambe a desempeña varios funcion den gobierno arubiano. Por ehemplo, e tawata hurista legislativo cerca Direccion di Legislacion, hefe di Maneho di Direccion di Orden y Seguridad Publico, hefe di e Staf di Maneho di Cuerpo Policial Aruba y Consehero di Maneho di Ministro di Husticia. Hellen van der Wal a studia Periodismo y Ley. Na 2011, el a obtene doctorado den Ley na Vrije Universiteit Amsterdam.
Funcionnan adicional:
- Presidente di Stichting Maatschappij & Criminaliteit (Fundacion Sociedad y Criminalidad)
- Miembro di Conseho di Supervision Fundacion Parke Nacional Aruba
- Presidente di Dutch Caribbean Nature Alliance
Glenn Thodé
Miembro riba proposicion di Boneiro, Sint Eustatius y Saba
Señor mr. dr. G.A.E (Glenn) Thodé ta miembro di e Colegio di supervision financiero di Boneiro, Sint Eustatius y Saba for di prome di juli 2020, riba proposicion di Boneiro, Sint Eustatius y Saba. El a inicia su carera administrativo na 2008, como gezaghebber di Boneiro. Glenn Thodé ta Presidente di e Comision Minimo Social Hulanda Caribense y di e Comision Supervision di Proteccion di Dato Personal BES. Anteriormente e tawata Presidente di e Conseho Electoral di Aruba, e Conseho di Supervision di e Fundacion Fondo General di Pensioen Aruba, y Comision Supervisor di Evaluacion di Consenso Ley di Reino di Husticia, y e Comision Asesor Scholengemeenschap Boneiro. Ademas, e tawata miembro di e Comision di Evaluacion Structura Estatal di Hulanda Caribense (Comision Spies).
Glenn Thodé a inicia su carera como instructor di software di computer y administrador di sistema. Despues el a cambia esaki pa e mundo academico. Riba encargo di Universidad di Aruba y Wereld Natuurfonds, el a elabora e proyecto legislativo pa e Fundacion pa Naturalesa y Parke. Di 1998 pa 2002, e tawata docente na Rijksuniversiteit Groningen y el a haci su investigacion di doctorado. Di 2002 pa 2008, e tawata (hefe di) trahado cientifico na Universidad di Aruba. Na 2012, el a bira rector di Universidad di Aruba. Na 2022, el a cuminsa traha na Rijksuniversiteit Groningen. Glenn Thodé a obtene un doctorado di Ley di Rijksuniversiteit Groningen.
Funcionnan adicional:
- Presidente di Commissie Toezicht Bescherming Persoonsgegevens BES (Comision Supervision di Proteccion di Dato Personal BES)
- Presidente di Stichting Nature Trust
- Miembro di NWO Programmacommissie Caribisch Onderzoek (Comision di Programa Investigacion Caribense di e Organisacion Hulandes pa Investigacion Cientifico)
- Docente parttime di Derecho Penal di Rijksuniversiteit Groningen
Elizabeth de Cuba
Miembro riba proposicion di Corsou
Señora J.E. (Elizabeth) de Cuba, RA, ta miembro di e Colegio di supervision financiero Corsou y Sint Maarten for di prome di october 2023, riba proposicion di Corsou. Como empresario independiente e tambe ta brinda servicionan den e area di accountancy, auditoria y finanzas. Di 2017 pa 2022, Elizabeth de Cuba a traha como control and methodology leader den e Professional Practice Group pa e Caribbean Assurance Practice di Ernst and Young. Den e funcion aki, e tawata traha estrechamente hunto cu Ernst and Young Caribbean na entre otro Trinidad & Tobago, Jamaica, Barbados, Saint Lucia y Surnam.
Di 2018 pa 2020, Elizabeth de Cuba tawata duna les di auditing na Universidad di Corsou. For di 2015, e tawata duna Auditing core learning classes como miembro di e team di Ernst and Young Certified Facilitators. Prome cu esey, e tawata traha den e funcion di audit manager cerca e departamento di assurance di Ernst and Young. Elizabeth de Cuba a studia Economics and Business y Accountancy na Erasmus Universiteit Rotterdam.
Funcionnan adicional:
- Directora di ARIA Solutions BV
Julisa Frans
Miembro riba proposicion di Sint Maarten
Señora J.A. (Julisa) Frans, MSc, ta miembro di e Colegio di supervision financiero Corsou y Sint Maarten for di 17 di december 2021, riba proposicion di Sint Maarten. Como consultant independiente e tambe ta eherce varios actividadnan di consehero. Di 2008 pa 2021, Julisa Frans a desempeña varios funcion financiero pa gobierno di Sint Maarten, entre otro esnan di empleado di gestion financiero y asesor (senior) di maneho financiero.
Julisa Frans tawata miembro di e Comision di Monitor encarga cu e supervision di e implementacion di e reformanan contene den e Pakete di Pais di Sint Maarten. Ademas, e tawata responsabel pa varios aspecto financiero di e actividadnan di recuperacion despues di orcannan Irma y Maria na 2017. Na 2008, el a obtene un bachelor den Finance and Accounting. Na 2018, el a obtene un master den Gobierno Publico y Desaroyo di University of Birmingham.
Funcionnan adicional:
- Directora di Intuition Financial Advisory & Consulting Services
- Portfolio & Accounting Officer (Compliance) Enterprise Support Project
Hans Hoogervorst
Miembro riba proposicion di Hulanda
Señor drs. J.F. (Hans) Hoogervorst ta miembro di e Colegio di supervision financiero Corsou y Sint Maarten, e Colegio di supervision financiero di Aruba y e Colegio di supervision financiero di Boneiro, Sint Eustatius y Saba for di 17 di december 2021, riba proposicion di Hulanda. Na 2002 y 2003, e tawata Ministro di Finanzas, y despues di esey, el a ser nombra Ministro di Salubridad Publico, Bienestar y Deporte. Como Ministro, el a introduci un sistema nobo di seguro medico. Na 2007, el a sali di politica y el a cuminsa traha pa e Autoridad Mercadonan Financiero, caminda el a ser nombra Presidente di Directiva. Na 2011, el a bira Presidente di e International Accounting Standards Board na Londres y miembro di e Conseho pa Stabilidad Financiero.
Hans Hoogervorst a inicia su carera den sector financiero internacional na Washington, pa despues regresa na Hulanda den e funcion di consehero di maneho. Posteriormente, e tawata activo den politica hulandes pa hopi aña, desempeñando varios funcion administrativo, cu tawata inclui un membrecia di 4 aña di Parlamento hulandes. Ademas, el a traha como Secretario di Estado di Asuntonan Social y Empleo. Hans Hoogervorst a studia Historia na Universiteit van Amsterdam y a obtene su master den Relacionnan Internacional di Johns Hopkins University na Washington.
Funcionnan adicional:
- Miembro di directiva di International Foundation for Valuing Impacts